თორნიკე შენგელია: “ყველაფერს გავაკეთებ იმისთვის, რომ NBA-ში თამაში დავიმსახურო”

თარიღი 18-07-2012, 09:08 | ავტორი: tornike baidoshvili | დათვალიერებულია: 979

(ხმები: 1)

NBA-ს საზაფხულო ლიგაზე მოასპარეზე თორნიკე შენგელია დღეს ბოლო, მე-5 შეხვედრას ჩაატარებს, სადაც მისი მეტოქე “ინდიანა” იქნება. დარჩება თუ არა “თოკო” NBA-ში, რომელიც 2012 წლის დრაფტზე “ფილადელფიამ” 54-ე ნომრად აიყვანა და “ბრუკლინ ნეთს” მიჰყიდა, ამას საზაფხულო დრაფტის დასრულების შემდეგ გავიგებთ.
“მსოფლიო სპორტის” მიერ ამერიკაში “თოკოსთან” დაკავშირება იმ დროს დაემთხვა, როცა იგი “ინდიანასთან” სათამაშოდ მოედანზე გასასვლელად ემზადებოდა. დროის სიმცირე გახდა მიზეზი, რომ შენგელიასთან ხანმოკლე საუბარს დავჯერდით.
- როგორ შეეგუეთ ამერიკულ კალათბურთს?
- თანდათან ვუშინაურდები და მწვრთნელი ყოველ მომდევნო შეხვედრაში მეტ დროს მაძლევს.
- ხომ არ გიჭირთ შეგუება?
- შეუძლებელი არაფერია. ყველაფერს ვაკეთებ იმისთვის, რომ აივერი ჯონსონს (“ბრუკლინ ნეთსის” მთავარი მწვრთნელი) თავი მოვაწონო და NBA-ში თამაში დავიმსახურო.
- კონკრეტულად როდის გაირკვევა თქვენი NBA-ში დარჩენა-არდარჩენის საკითხი?
- “ბრუკლინ ნეთსში” მნიშვნელოვანი ცვლილებები იგეგმება, საუბარი მიმდნარეობს დუაიტ ჰოვარდის დამატებაზე. თუ როდის გაირკვევა ჩემი NBA-ში დარჩენის საკითხი, ზუსტად ვერ გეტყვით.
- დავუშვათ ევროპაში დაბრუნება მოგიხდათ, ამ შემთხვევაში სად ითამაშებთ?
- “შარლერუასთან” (ბელგია) კიდევ ერთწლიანი კონტრაქტი მაკავშირებს. ასევე მაქვს მიწვევა გერმანიის, იტალიის, ისრაელისა და ესპანეთის გუნდებისგან. ჯერჯერობით, არ ვიცი სად განვაგრძობ კარიერას.

წყარო: როლანდ ლაბუჩიძე